حشوات لكل شي ..

الحشوات اللي تنفع للسمبوسه - السبرينغ رول-الجلاش -التوست- حتى المطبق اللي يكون بعجينة السمبوسه الكبيره ونصفطها مربعه تكون للشوي على التاوه
- للشنكار او حتى فطاير -

[size=21]سمبوسة الماش
كوبين ماش تنقعينهم بماي حار ساعه وتسلقينهم لحد ما يستوي مو ينهري وينشخل
القشره مالت ممكن تستغنين عن جزء منها اثانء الغسل بس لازم يكون فيها قشر عشان طعمه

تحمسين عشر بصلات كبيره مفروه مو ناعم وسط لحد ما تذبل مع شوي زيت
تضيفين لها 4 مكعبات ماجي خضار وكمون صحيح وكزبره مطحونه ناشفه وفلفل اسود
ولما تشرب البهارات تضيفين لها كوبين كزبره خضره مفرومه وتحمسينها معاه لما تنشف على نار قويه اضيفي لها الماش وخليها وياه مع التقليب دقيقتين بالاخر اضيفي ملعة اكل ثوم مهروس مع حبة فلفل اخضر حار وقلبي شوي بس تطلع ريحته وعدلي الملح حسب ذوقك
وتبرد وتحشى بها السمبوسه

سمبوسة البيتزا
جبن مزارولا مبشوره كوب
جبن كرفت ازرق علبة وسط مبشوره
كوب زيتون اخضر الشرايح بس نفرمه خشن
بصله متوسطه مفرومه ناعم
حبة فلفل اخضر مفرومه ناعم
علبة مشروم مفرومه خشن شوي
رشة اوريغانو
تخلط مع بعض مثل السلطه
وتحشى بالعجينه

سمبوسة اللحم
نص كيلو لحم مفروم
5 بصلات كبيره مفرومه
4 فصوص ثوم مفرومه ناعم
رشةكمون ناعم
رشة كزبره ناعمه
رشة قرفه
فلفل اسود وملح
ملعقة اكل كزبره خضره مفرومه

حطي اللحم على النار في مقلاة واسعه وخليه على نار قويه لحد ما ينزل مايه ويتبخر قبل لا ينشف حطي البصل والثوم والبهارات
خففي النار وخليه مغطي يتسبك 10 دق
قبل لا تطفين عليه حطي الكزبره عشان ريحتها وارفعيها

سمبوسة الجبن
علبة كبيره جبن كرفت مبشوره
كيس جبن مازارولا
نص كوب بصل اخضر مفروم ناعم
تخلط وتحشى

سمبوسة البطاط والبزاليا
كوبين مكعبات صغيره من البطاط تسلق دقيقتين وترفع
كوبين بزاليا مسلوقه
بصل مفروم ناعم
كمون حب
كزبره خضراء مفرومه كميه كوب
ماجي مكعبين
حبة فلفل اخضر حار مفروم
نتفة زنجبيل اخضر مبشوره
نص ملعقة اكل كاري ا
البصل تقريبا 7 بصلات
حمريه بشوية زيت ومعاه ملعقة اكل كمون حب وحطي البطاط وقلبي وحطي الماجي والبزاليا والفلفل والزنجبيل وقلبيه لحد ما يتشرب من بعض
اخر شي حطي الكاري والكزبره وذوقي الملح والفلفل برديها واحشي

سمبوسة الخضار بالشبنت

كيس كيلو خضار مشكله (جزر-بزاليا-فاصوليا-ذره)
5 بصلات مفرومه معاها 5 فصوص ثوم مفرومه
شده شبنت
مكعبين ماجي
ملعقة مشكله من الهارات ( كمون-كزبره-كمون-فلفل اسود -كركم)
اسلقي الخضار شوي لحد ما تنضج الا شوي
احمسي البصل جيدا مع الماجي والبهارات والشبنت اضيفي الخضار وقلبيه يشرب من بعض
وبردي واحشي

سمبوسة الدجاج
دجاجه مسلوقه مفتته
5 بصلات مفرومه
فصين ثوم كبار مفرومين
حبة فلفل اخضر حار مفرومه
علبة مشروم شرايح مفرومه خشن
مكعبين ماجي
ملح وفلفل
ملعقة اكل زبده

حمري البصل بشوية زيت حتى يذبل اضيفي الماجي وبس يذوب بالبصل اضييفي المشروم وقلبيه يتحمر مع البصل اضيفي الدجاج وغطيه شوي يتسبك

ضعي الزبده في مقلاة صغير مع الثوم والفلفل الحار وبس ريحته تطلع اضيفيه للحشوه وقلبيه معاه جيدا وسكري عليها وبرديها واحشي

سمبوسة الشاينيز
كوبين ملفوف مفروم شرايح
كوب جزر مفروم شرايح
حبة فلفل اخضر مفروم شرايح
ومثلها حبة فلفل احمر ومثلها حبة فلفل اصفر
3 اكواب بصل شرايح
ربع كوب صلصة صويا او اقل شوي
مكعبين ماجي

حمري البصل الى ان يذبل شوي اضيفي باقي الخضار وقلبيها على نار قويه شوي ولما تسخن خففي النار وغطيها بس خمس دقايق عشان لا تذبل واكشفيها وقلبيها لحد ما تنشف اضيفي الصويا وبس تشربها سكري عليها
طبعا الماجي ينضاف مع البصل اولا

سمبوسة المشروم بالذره
3اكواب بصل مفروم
علبتين مشروم شرايح ومفروم خشن
كوب ذره مسلوقه
نص كوب كزبره خضره مفرومه
5 فصوص ثوم مفرومه
مكعبين ماجي
ملعقة صغيره كزبره ناشفه مطحونه
حمري البصل مع الماجي والكزبره الناشفه وبس تطلع ريحتها اضيفي المشروم وقلبيه جيدا اضيفي الثوم وقلبي وبس تنشف اضيفي الذره والكزبره وسكري عليها
سمبوسة البطاط بالمعبوج (حاره)
تقريبا 5 اكواب بطاطس مقطعه مكعبات صغيره جدا
3 اكواب بصل مفروم
ملعقة اكل كمون حب
ورشة كزبره ناشفه
من ملعقة اكل الى ملعقتين معبوج(فلفل اخضر او احمر مفروم ناعم مع ثوم وينباع جاهز )

حطي ربع كوب زيت وحطي البطاط مع البصل والكمون وقلبيه عدل غطيه شوي عشان تستوي البطاطا
لا تهرينها
ارفعي النار وقلبي لما تحسن البطاط بدأ يتحمش والبصل يشقر
اضيفي ملح وفلفل اسود
واخيرا المعبوج بس لا تقربين منه ريحته بتطلع قويه وبتكحين من حرارته

طريقة المعبوج الكويتي
راس ثوم
ملعقة ونص اكل كبيره فلفل احمر هندي مجروش بالبذور وهو يكون مجفف وحار
ملعقتين كبار زيت
ملعقة اكل او اقل ملح
ملعقة اكل مسح كزبره ناشفه مطحونه ويفضل محموسه قبل طحنها
يفرم جميعها مع بعض بالمفرمه ويكون مثل المعجون وتحفظ ببرطمان زجاجي ويرش سطحها برشة زيت حتى لا تنشف
سمبوسة مسخن الدجاج
كيلو دجاج صدور مسلوق ومنسل خشن
4 اكواب بصل مفروم خشن
نص كوب مليان صنوبر (يحمر بملعقة طعام زبده وملعقتين زيت زيتون)
4 مكعبات ماجي
قرفه ناعمه-فلفل اسود-بهارات مخلوطه
2 ملعقة طعام سماق يضاف مع الصنوبر بالآخر
حمسي البصل وبس يذبل اضيفي الماجي والبهارات وقلبيها مع الدجاج وغطيه 10 دقايق على نار هاديه عشان يشرب من بعض ولو شفتيه ناشف رشي من مرق الدجاج نتفه
بعد ما تتسبك اضيف السماق والصنوبر بزيته وطفي النار وبس يبرد احشي

سمبوسة اللحم السريه
كيلو لحم مفروم نص بقري ونص غنم
3 اكوب مليانه بصل مفروم
كوب بصل مقلي(حطير ربع كوب زيت في مقلاة صغيره وحطي فيها كوب بصل مفروم ناعم وحمريه بس لا يحترق بس يصير ذهبي نزليه بمصفاة عشان يتصفى ويبرد ويكون ذهبي مقرمش

ملعقة طعام ثوم-ملعقة طعام-خل-ملعقة طعام دبس رمان
بهارات
1 م ص كل من -كمون -قرفه-فلفل اسود-كزبره ناشفه
مكعبين ماجي
كوب كزبره خضراء

نزلي اللحمه في مقلاة تيفال بدون دهن ونشفيها مع ملعقة الثوم والخل ودبس الرمان وبس تبدي تنشف اضيفي البصل 3 اكواب والماجي والبهارات والملح وقلبي زين وغطيها ربع ساعه يستوى البصل مع اللحم
وبعدها اكشفي وقلبي بنار قويه عشان تنشف شوي لو كانت منزله ماي
وبس تنشف سكري عليها وارفعيها
خليها شوي تهدا واضيفيلها البصل المحمر والكزبره الخضراء واحشي

سمبوسة البطاط بالنقانق
هذي اسويها حمسه للسندويتشات الصغير بس جربتها لسمبوسه وطلعت لذيذه
كوبين بطاط مكعبات صغيره
3 اكواب بصل
بكت نقانق ربع كيلو مقطع مكعبات صغيره
كوب فلفل اخضر مفروم
ملعقة طعام ثوم
ملعقة طعام كاتشب
ملعقتين طعام صلصة صويا
فلفل اسود وملح مكعب ماجي
شوية شطة حمرا او قرن فلفل اخضر حار مفروم
حمسي البصل مع 4 ملاعق زيت بس يذبل شوي اضيفي البطاط والماجي والثوم وقلبيه
غطيه خمس دقايق بس يستوي البطاط شوي ثم اكشفيه واضيفي النقانق والفلفل وقلبي الى ان يتحمس مع بعضه سكري النار واضيفي الكتشب والصويا والملح والفلفل وبردي واحشي

سمبوسة المرتديلا بالذره
اعتذر ما صورتها لاني سويتها من قبل
الحشوه
3 اكوب ذرة تسلق دقيقه وبس تنشخل اضيفي لها ملعقة شاي زبده وفلفل اسود وخليها تبرد
كوب بصل اخضر مفروم
كوب فلفل اخضر واحمر مفروم نص بنص
نص كوب جبن مازارولا مبشوره
كوب مرتديلا مفرومه مربعات صغيره
فلفل اسود وملح
تخلط مع بعض وتحشى

سمبوسة العدس الاحمر
فوحي عدس احمر بس لا ينهري ما يطول
بصل مفروم
ثوم
ماجي
جزر مبشور
احمسي البصل بالماجي - مون-فلفل -بهارات لحم- ملح
لازم يستوي اضيفي له الجزر وحمسي شوي اخيرا اضيفي له العدس الاحمر المسلوق ورشة فلفل اخضر خليه يتسبك 3 دق وهو متغطي

الباذنجان
قصيه مكعبات وافرديه بصينيه ورشيه زيت واشويه لازم الفرن حار جدا عشان بسرعه يتلون
حمري بصل شوي وقبل النضج اضيفي له ثوم وفلفل حار وقلبيه اضيفي البذنجان وقلبي عشان يشرب النكهه ملحيه زين سكري عليه ورشيه شوي بقدونس مفروم للتعطير

سبانخ بالجبن
بكت سبانخ مثلجه تعصرينه الى ان ينزل مايه كله ويكون ناشف
جبن ابيض خشن مو الكريمي ممكن الفرنسي الخشن يتفتت ويخلط مع السبانخ بعد ما نفرمها
نرش عليها بس شوي زيت زيتون وفلفل اسود

حشوة السبانخ العادي
نفس حشوتك الخاصه بالفطاير بس انا اضفت لها الزركش الايراني للحموضه كبديل للسماق

البطاط المهروس
اشوي بطاط بالفرن الى النضج وقشريه وبرديه واهرسيه

حمري بصله مفرومه ناعم مع ماجي وثوم وفلفل اخضر حار وكمون حب وبس يذبلوا اضيف له كزبره خضرا واضيفيهم للبطاط وقلبي بالشكوه وملحيها

ذره وبس
ذره مسلوقه واول ما تطلع من السلق بس اضيفي لها رشة فلفل اسود وفلفل اخضر بارد مفروم
كل كيلو ملعقة فلفل مفرومه بس للنكهه وملحيها اثناء السلق

سمبوسة البروكلي
بسيطه ومفيده اطبخي البروكلي على البخار حتى 3/4 استواء لا ينهري برديه زين افرميه خشن شوي
حمري بصله مع مكعب ماجي حتى تذبل اخلطيها مع البروكلي ومعاهم نص كوب جبن شيدر مبشور
البروكلي 4 اكواب بعد الفرم الخشن تقيسينه وملحي وتبلي بالفلفل الاسود بس

كولو سلو
شرايح ملفوف ابيض

جزر مبشور
ماجي-بصل جوانح
حمري جوانح بصل رفيعه الى ات تذبل ارفعي النار واضيفي الجز والملفوف وافركي الماجي مع التقليب القوي وعلى نار قويه للتنشيف لازم تقرمش
وبس اختبري الملح والفلفل وبس

سمبوسه عتيجه
هذي شغل اول وبسيطه
لحم مفروم
بصل خشن
كشمش منقوع بماي
لومي اسود مطحون
قرفه وهيل فلفل اسود-كمون بهارات لحم
نزلي اللحم يتنشف بالمقلاة بدون دهن قطي عليه البصل وقلبيه الى ان يذبلون وينضجون اضيفي البهارات والكشمش --كله حسب الرغبه المقادير هي تكون حامضه نتفه وريحتها هيل وقرفه وبالاخير نضيف الملح والفلفل الاسود

يسلمووووووووو

يعطيك العافيه

يسلمو يالغلا ..
ماننحرم منك ..